من الطايف .. اكتب لكم ..

فقدتكـــــــــــــم ..

وحشتــــوني ..

بسألكم ..
وشلون عنيزة بدونــي ؟!!




الساعة الخامسة من عصر يوم الاربعاء ..

كريم راكب فوق( التنده) يركب العفش والشناط ...

الساعة السادسة ..

ركبنا السيارة استعدادا للرحيل ..
بس على طاري الساعة 6 انا اخبر الوالد ليلة الاربعاء دق علي يقول : يالله امش نم ترى الساعة 4 العصر وحنا ماسكين الخط ان شاءالله .. نبي نلحق قبل الليل !!

المهم ..

بسم الله .. مشينا ..

طبعا انا (السواق)

اول ما مشينا وقبل ما نطلع من الحارة والوالد بدا يعطيني (توجيهاته) !!

يمين يمين يمين !!

طيب ادري .. احد مايعرف منين طريق المدينه ؟!!

تقريبا الساعة 7 مسكنا الخط ..

شوي والوالد يفتح الدرج حق سيارته (ويحبرش) فيه ,,

صكه بقوه وزعلاااااااااااان ..

وشبك يابو الشباااب ؟!!


يسأل :
من اللي ماخذ (شريطي) ومضيعه ؟!!!

كلنا نتلفت محد يدري من!!

سألته : وشو شريطك ؟؟ (قلت يمكن على هالزعله كاظم ولا هاني شاكر ولا شي ؟)


قال شريط (عباس ابراهيم) !!!


من جد ؟!!


وكل هالزعل واخرته عباس ابراهيم !!

فتح الدرج ثاني مره ويركب شريط (رابح صقر) الاخير ..

انا مدري وش فيه الوالد يوم كبر شان ذوقه !! ولا والله ما خلان احب كاظم وانا صغير الا هو !!


المهم يشغل الشريط .. (ولا اغنيه تفتح النفس) ..
واقوله : قضوا الفنانين تسمع لرابح ؟؟

يقولي وش عرفك انت ؟! ذا جديد 2006 (يقاله يعرف بالجديد) !!


عجزت اكمله ..

طلعت الشريط وادخل خلفهم كاظم ,,

وسلطنه منا الى عفيف !!

عقب عفيف نزلت ركبت رديف وجاء الوالد وساق الى ظلم ..

انا نايم وصحيت على صوت طرطعان !!

وش السالفه يا ولد ؟!!

الا هذا موكب بدوات يمشون ورا العريس وواحد منهم طالع مع الفتحة (برشاش) !!


(عبودي) ممسكه معه على مندي !!

وقفنا اخذنا غرفة ويطلبلنا مندي ..

جاء المندي ..
الجميع رفض الاكل ما عدا شخصين ..

اتحداكم منهم ؟!!














اكيد انا والوالد ,, يعني من ؟!!



المهم ..


اكلنا والحمدلله يارب ..

لا طعم ولاريحه ولا شكل بس نسد الجوع اللي بنا !!


تعشينا ومشينا ..


وصلنا للطايف الساعه الثانية فجرا ..

دايخيـــــــــــــــن ..

ندور الفراش ..

قعدنا ندور ساعتين ندور شقة ,,

وتجيك (المسكه) الثانيه ,,


عبودي يبي برشومي !!!


يالله صباح خير ..


يبه والله دايخين نبي ننام ..

وبالاخر اقتنع ,,


كل شوي نوقف عند شقق مفروشه

انزل ,, بالبدايه اتشرط .. اسأل عن الدي اس ال قبل ما اسأل عن الشقة !!

ولا واحد قال عندنا نت ..

حتى فيه بدوي بأحد الشقق قاعد بالاستقبال سألته : عندكم واير ليس ؟

رد علي يقول .. وشهو ورلس ذا ؟؟!!


المهم لقينا شقة بالاخير (نص خايسه) بس غاليه شوي .. (يازين الرصافة بس ) !!


لا دي اس ال .. والهندي عيا ينزل معي العفش بعد !!


دخلنا وما صدقت على الله اشوف الفراش وزاروقي ولا قمت الا العصر ,,

صحيت ويمرن عمي وسيده على (البيك) !!

تغديت ,,
بعدين رحنا مرينا ولد عمتي وثاني مره مايردنا الا البيكـ !!


تعشينا وصلينا العشاء وطلعنا لمنتزه عائلات وهناك التقيت بأصدقاء (قديمين) جدا





ابو هنقلين ودحوم !!


يا الله وش جاب طاش ما طاش فيذا ؟!!



درنا وتمشينا الين داخت روسنا ..
ورجعنا للبيت مبكرا ,,

والحين هذاي (اكلمكم) من شقة مستاجره ولد عمي (بس فيها دي اس ال) شكل راعيه يقرب (للرصافه) !!










ادري سالفه بايخه .. ومالها داعي ,,

بس وش اسوي ؟!!


البعد عنكم جاب لي الهم ..


يوووووه صح بكرا العرس ولا وديت ثيابي للمغسلة !!




شكلي عقب العرس (بسنتر) عند اقرب نقل جماعي !!

برجع ,, بس لحظه ..

بسوي تصويت ,,

اذا تبوني ارجع قولوا: سلام ,,

واذا ما تبوني قولوا: عليكم السلام !!!


اقول : روقنا بس !!


الا على فكره ..

متى التفريقة ؟!!


كان معكم ع ع خ من برنامجكم الاسبوعي (سواليف قصيرة ومفيده) !!



تبون الصدق ؟!!

والله (ولهت) عليكم ..


مشتاااااااااااااق ..




نشوفكم على خير ,,